«دەنساۋلىق – باستى بايلىق» دەگەن قاعيدا ءومىردىڭ شىندىعى ەكەنىن جان-تانىڭمەن ۇعىناتىن ساتتەر بولادى. جايشىلىقتا مۇنى ەلەپ-ەسكەرە بەرمەيتىنىمىز وكىنىشتى. دەنەمىزدى دەرت دەندەپ, جانىمىز قىسىلعاندا, كۇيكى تىرلىكتىڭ ءبارى جايىنا قالىپ, جان دارمەنىمىز قالماي شيپا ىزدەيمىز. مۇندايدا سۇيەنەرىمىز قۇداي, سوسىن – اق حالاتتى ابزال جاندار.
جۋىردا ومىرىمدەگى اسا ماڭىزدى كەزەڭنىڭ ءبىرىن باستان وتكەردىم. استاناداعى ۇلتتىق عىلىمي كارديوحيرۋرگيا ورتالىعىندا جۇرەك قان تامىرىما كۇردەلى شۋنت ورناتۋ وتاسى جاسالدى. بۇل شەشىمدى قابىلداۋ وڭاي بولعان جوق. بىراق مەديتسيناعا, ونىڭ ىشىندە ءوز ىسىنە جانىمەن بەرىلگەن دارىگەرلەرگە دەگەن سەنىم مەنى سەرپىلتتى. ءۇمىت پەن ۇرەيدى تەڭ ارقالاعان جاۋاپتى ساتتە جانىمنان تابىلىپ, قولداۋ بىلدىرگەن دارىگەرلەردىڭ كاسىبي شەبەرلىگىنىڭ ارقاسىندا كۇردەلى وپەراتسيا ساتىمەن اياقتالدى.
وسى رەتتە, ەلورداداعى ەمدەۋ مەكەمەسىنىڭ گۇلجان شالاتايقىزى جەتەكشىلىك ەتەتىن №2 كارديولوگيا ءبولىمىنىڭ ماماندارىنا دەگەن شىنايى العىسىمدى ءباسپاسوز ارقىلى جەتكىزگىم كەلدى. بۇل ماقالا ارقىلى ولاردىڭ ەڭبەگىنە باس ءيىپ, وتاندىق مەديتسينانىڭ وركەندەپ كەلە جاتقانىن, جۇيەلى قادامدار مەن ادامي قارىم-قاتىناستىڭ ەم-دوممەن قاتار ماڭىزدى ەكەنىن ايتقىم كەلەدى.
قاي ىستە دە ەڭ باستىسى – سەنىم مەن كاسىبيلىك. بۇل قوس ۇعىم وتاندىق مەديتسينا سالاسىندا كەڭ ءورىس الا باستاعانىنا كوزىم جەتتى. جانىمدى امان الىپ قالعان جۇرەك حيرۋرگياسى ءبولىمىنىڭ بىلىكتى دارىگەرلەرىنە, وتا توبىنا, مەدبيكەلەر مەن مەيىرگەرلەرگە ايتار العىسىم شەكسىز.
ادام ومىرىنە اراشا ءتۇسۋ – دارىگەر اتاۋلىنىڭ ەڭ ۇلى ميسسياسى دەسەك, وسى ءبىر سەنىمنىڭ ۇدەسىنەن تابىلىپ, جانعا جۇبانىش سىيلاعان ءوز ءىسىنىڭ شەبەرلەرى قانداي قۇرمەتكە دە لايىق. وسى ورايدا, وزىمە وتا جاساعان بىلىكتى دارىگەرلەر بەسلان حۋتساەۆ پەن مۋرادىم مۋرزاگاليەۆتىڭ ەڭبەگىن اتاپ وتۋگە ءتيىسپىن. بۇل ازاماتتار –ناعىز مايتالمان ماماندار. جەتەكشى كارديوحيرۋرگ رەتىندە ولاردىڭ تەك تەحنيكالىق تۇرعىدان ەمەس, ادامي قارىم-قاتىناستا دا جوعارى مادەنيەتتى, پايىم-پاراساتى بيىك جاندار ەكەنىنە كۋا بولدىم. بۇگىندە ولاردى تەك مەن ەمەس, تالاي ناۋقاس العىسقا بولەپ جۇرگەنىنە كۇمانىم جوق.
ۇلكەن تاۋەكەلگە بەل بايلاردا بۇكىل ءومىرىڭ كوز الدىڭنان سىرعىپ ءوتىپ, تەرەڭ ويعا شوماسىڭ. ەمحانا دالىزىنە تەلمىرە قاراپ, وتكەن-كەتكەن ادامنىڭ جانارىنان جىلىلىق ىزدەيسىڭ. «كوڭىل – كوڭىلدەن سۋ ىشەدى» دەگەن تىركەستىڭ تامىرىنا تەرەڭ بويلايسىڭ. مۇندايدا ءبىر عانا جىلى ءسوز – جانعا ءدارۋ. جوعارىدا اتاپ وتكەنىمدەي, گۇلجان شالاتايقىزى جەتەكشىلىك ەتەتىن №2 كارديولوگيا ءبولىمىنىڭ ماماندارىنان ايرىقشا ادامي جىلىلىقتى سەزىندىم. بۇل ءبولىم – ءبىلىم مەن بىلىكتىڭ, مەيىرىم مەن ىزگىلىكتىڭ ۇجىمى دەرسىز. اسىرەسە بولىمدە ەڭبەك ەتىپ جۇرگەن جاس مامانداردىڭ ىقىلاسى مەن ىسكەرلىگى جانىما جىلۋ ۇيالاتتى.
ءبىز «جاستار – ەل بولاشاعى» دەيمىز, ال مۇندا سول ءسوزدىڭ ناقتى بەينەسىن كورەسىڭ. جان-تانىمەن قىزمەت ەتەتىن, ناۋقاستىڭ كوڭىل كۇيىن قالت جىبەرمەيتىن, كوزىنەن قورقىنىش بايقالسا, دەمەۋ بولاتىن وسىنداي جاستارعا قاراپ ۇمىتتەنەسىڭ, قۋات الاسىڭ. اسىرەسە جاس مامانداردىڭ كاسىبي ساۋاتتىلىعى, مادەنيەتتىلىگى, ناۋقاسپەن جۇمىس ىستەي ءبىلۋ ەتيكاسى قۋانتتى. قاراپايىمدىلىق پەن سىپايىلىقتى سەرىك ەتكەن ولار – بولاشاقتىڭ ءۇمىتى. ادام تاعدىرى ءۇشىن كۇرەسىپ جۇرگەن جاستارىمىزدىڭ بويىنان تەرەڭ تاربيە مەن ادامگەرشىلىكتىڭ ونەگەسىن كورۋ قانداي عانيبەت.
پىشاققا تۇسەتىنىمىزدى ويلاعاندا ەرىكسىز جۇرەكسىنىپ, بولماشى ۋايىمعا بوي الدىرماۋعا تىرىستىق. بىراق ءدال وسىنداي كەزدە جىلى ءسوز, جاناشىرلىقپەن جاسالعان قامقورلىق جانعا ەڭ ۇلكەن دەمەۋ ەكەنىنە تاعى كوزىم جەتتى. مەدبيكەلەر مەن سانيتارلاردىڭ شىن كوڭىلدەن كورسەتكەن ىقىلاسى, ءوز جۇمىسىنا ادالدىعى مەن تازالىعى – ناعىز ادامدىقتىڭ ايعاعى.
بۇل ۇجىمدى اۋىزبىرشىلىك پەن ىزگى نيەتكە جۇمىلدىرىپ, وسىنداي بيىك رۋحتاعى ورتانى قالىپتاستىرعان باسشىلىقتىڭ ەڭبەگى زور دەپ ەسەپتەيمىن. ادامعا دەگەن جاناشىرلىق – ناعىز ەمنىڭ باستاۋى. مەن وسى جۇرەكتەن شىققان العىسىمدى دارىگەرلەر قاۋىمىنا, اسىرەسە استاناداعى جۇرەك ورتالىعىنىڭ قىزمەتكەرلەرىنە ارنايمىن.
ادام جانى مەن جۇرەگى – اسا نازىك الەم. سول الەمنىڭ تىنىسىن قالپىنا كەلتىرىپ, ادام ءومىرىن اجالدان اراشالاپ جۇرگەن اق حالاتتى جانداردىڭ ەڭبەگى – ولشەۋسىز. جاندارىڭىزعا ساۋلىق, قىزمەتتەرىڭىزگە تولايىم تابىس تىلەيمىن, ىزگى جاندار!
ءالىم جۋسانباەۆ,
كەدەندىك وداققا مۇشە مەملەكەتتەردىڭ قۇرمەتتى ازاماتى,
مەملەكەتتىك كىرىستەر كوميتەتىنىڭ ۇزدىگى